HATAW! D'yaryo ng Bayan hatawtabloid.com
MULING bumanat si Carmelo Anthony upang buhatin ang New York Knicks sa 102-92 panalo kontra two-time defending champions Miami Heat kahapon sa 2013-14 National Basketball Association, (NBA) regular season.
Kumana ng 29 puntos, walong rebounds at limang assists si 2003 first round third pick Anthony para itarak ang three-game winning streak at ipinta ang 13-22 win-loss slate.
Si Raymond Felton na bumira ng 13 points at 14 assists ang nanguna sa 16-2 run ng Knicks para talunin ang Heat.
Nakakaapat na panalo sa limang laro ang New York laban sa Miami sa huling dalawang seasons.
Nagsumite rin si Amare Stoudemire ng 14 puntos at 11 boards para sa New York upang punan ang pagliban nina center Tyson Chandler at J. R. Smith.
Hindi naman sumapat ang 32 points, six assists at five boards ni four-time NBA MVP LeBron James dahil nalasap ng Heat ang pang siyam na kabiguan sa 36 na laro.
Tumapos naman si Dwyane Wade ng 23 puntos at apat na rebounds habang 12 puntos ang binakas ni Norris Cole para sa Heat.
Samantala, babalik ang Heat sa New York sa Pebrero 1 para sa kanilang ikalawang paghaharap sa season na ito. (ARABELA PRINCESS DAWA)
