HATAW! D'yaryo ng Bayan hatawtabloid.com
KRITIKAL ang apo ng komedyanteng si Willie Nepomuceno habang sugatan naman ang kasama matapos pagbabarilin ng kalalakihan na nakasakay sa kotse sa Marikina City kahapon ng madaling araw.
Kinilala ni Marikina City Police chief, Senior Supt. Reynaldo Jagmis ang biktimang si Gabriel Nepomuceno, 16, kasalukuyan ginagamot sa Amang Rodriguez Memorial Medical Center (ARMMC).
Sugatan din ang kaibigan niyang si Frank Raven Diocson, 17, anyos, tinamaan ng bala sa hita at pinauwi na matapos malapatan ng lunas.
Sa ulat, naganap ang pamamaril dakong 2:50 a.m. sa Bayan Bayanan St., Brgy. Marikina Heights, Marikina City.
Nabatid na galing sa computer house ang magkaibigan at papauwi na nang dumaan ang isang sasakyan at pinagbabaril ang dalawang biktima.
Ayon kay Sr. Supt Jagmis, bago naganap ang pamamaril ay nagkaroon ng komosyon sa nasabing computer house habang papunta ang magkaibigan kung kaya’t posibleng napagkamalan lamang sila.
Nabatid sa hepe ng pulisya na ilang saksi ang nakakuha ng plate number ng sasakyan at nagsasagawa na ng follow-up ang pulisya sa Land Transportation Office (LTO) para sa pagkakakilanlan ng mga suspek.
nina MIKKO BAYLON/ED MORENO
