HATAW! D'yaryo ng Bayan hatawtabloid.com
TATLO katao ang patay matapos sumalpok ang sinasakyan nilang van sa nakaparadang truck sa North Luzon Expressway sa Malolos, Bulacan, kahapon ng umaga.
Kinilala ang mga namatay na sina Cynthia Medina, 49; Consuelo Repuyo, empleyado ng LGTM Corporation sa Pangasinan; at isang alyas Albert ng Tarlac.
Nakaligtas naman si Imelda dela Cruz, 43-anyos.
Ayon kay Malolos Police Head, Supt. Dave Poklay, dakong 7 a.m. nang maganap ang insidente sa southbound ng NLEX sa bahagi ng Brgy. Ligas sa Malolos.
Nabatid na patungong Maynila ang van nang mawalan ng kontrol ang driver nito dahilan upang sumalpok sa nakaparadang truck.
(DANG GARCIA)
2 BUS NAGSALPUKAN 15 SUGATAN
KORONADAL CITY – Umakyat na sa 15 ang mga biktimang nasugatan sa salpukan ng dalawang bus ng Yellow Bus Line Inc. sa lungsod ng Koronadal.
Ito ang kinompirma ni Boy Par, operation manager ng nasabing bus line, matapos nagkabanggaan ang dalawang unit nito sa kahabaan ng Brgy. Paraiso ng lungsod pasado 5 a.m. kahapon.
Ayon kay Par, umilag sa sinusundan na tricycle ang isang bus ngunit kumabig sa kabilang linya at eksaktong may paparating na isa pang bus na naging dahilan ng pagbanggaan ang dalawang sasakyan.
