Kelot nanampal ng waitress (Toma at pulutan pinatungan?)

SA halip na magbayad nang nainom at napulutan, sampal ang inabot ng isang waitress matapos nitong singilin ang isang naglasing na kelot kahapon ng madaling araw sa Caloocan City

Kasong Estafa, Alarm and Scandal at Physical Injury ang kinakaharap ng suspek na kinilalang si Rubiano Fausto, 37-anyos, ng Visayas Avenue, Quezon City habang nakapiit sa detention  cell ng Caloocan City Police.

Batay sa ulat ng pulisya, dakong 2:00 ng madaling araw nang maganap ang  insidente sa loob ng barangay hall ng Barangay 88 ng lungsod.

Sa salaysay ng biktimang si Maritess Cawayan, waitress ng Zone 88 bar, nasa  Ground floor ng North Mall,  uminom at namulutan ang suspek sa kanilang bar  hanggang madaling araw.

Dakong 1:45 nang hingin nito ang chit para sa kanyang nainom na umabot ng P 4,000 pero sa halip na magbayad ay nagalit pa ito sa dalaga at kung ano-anong akusasyon ang pinagsasabi.

Nang hindi tumigil sa pagwawala ang suspek,  tumawag ng mga barangay tanod ang kasamahan ng waitress para dalhin ito sa barangay hall at doon singilin.

Dito na sinampal ng suspek ang waitress dahilan upang ilipat at ikulong sa presinto si Rubano.

(rommel sales)