HATAW! D'yaryo ng Bayan hatawtabloid.com
UMAATIKABONG karera ang magaganap sa Disyembre 15 sa gaganaping Philtobo Grand Championship races sa bakuran ng Santa Ana Park sa Naic, Cavite.
Tampok ang limang malalaking pakarera ng Philtobo na kinabibilangan ng Juvenile Championship race, Juvenile Fillies Championship race, Classic Stakes race, 3 Year Old Fillies Stakes race at 3 year Colts Stakes race.
Tumataginting na mahigit na P6- milyon ang nakalaang papremyo para sa malaking pakarera ng samahan ng mga horse owners sa bansa— ang Philtobo para sa kanilang taunang pakarera.
Naglaan ng P3-milyon ang Philtobo para sa Juvenile Champioship na tatawid sa distansiyang 1,600 meters, habang P1-milyon sa Juvenile Fillies, kalahati sa Classic championship at tig P400,000 para sa 3 year old Fillies at Colts Stakes races.
Inaasahan na magiging matagumpay ang naturang pakarera dahil higit na malalaking papremyong ang kanilang inilaan kumpara sa pakarerang ginawa ng Marho noong Nobyembre 24 sa nasabing karerahan.
Samantala matutunghayan na sa darating na Linggo ang malaking pakarera ng Philippine Charity Sweepstakes Office (PCSO) ang Presidential Gold Cup sa kabilang karerahan ng San Lazaro Leisure Park sa Carmona, Cavite.
Umaabot naman sa P5-milyon ang inilaang papremyo ng PCSO sa kanilang pakarera na lalahukan ng pinakamagagaling na mananakbong lokal na pangarerang kabayo sa bansa.
Kabilang sa mga kalahok ang super horse na si Hagdang Bato ni Mandaluyong City Mayor Benhur Abalos, Pugad Lawin, Sulong Pinoy, Divine Eagle, Royal Jewels, My Champ Spring Collection, Boss Jaden at Arriba Amor.
Nakalaan ang P3- milyon premyo para sa tatanghaling kampeon sa 41th Presidential Gold Cup.
Ni andy yabot
