ASG member huli sa Zambo (Suspek sa Jehovah’s witnesses kidnapping)

ZAMBOANGA CITY – Isang wanted kidnapper na sinasabing miyembro ng Abu Sayyaf Group (ASG), ang naaresto sa Brgy. Tictapul sa Zamboanga City.

Ayon sa mga awtoridad, ang suspek ay kinilalang si Ustadz Nijal Pajiran alyas Abdurahman at Abu Kudama.

Nadakip ang suspek ng magkasanib na pwersa ng iba’t ibang unit ng Philippine National Police at militar kasama ang mga tauhan ng grupo na bumubuo ng Presidential Anti-Organized Crime Commission.

Batay sa warrant of arrest ng nahuling bandido, nahaharap siya sa anim na bilang ng kasong kidnapping with serious illegal detention with ransom.

Kabilang siya sa mga miyembro ng ASG na kumidnap sa anim na miyembro ng Jehovah’s Witnesses at pamumugot sa ulo ng dalawa sa mga biktima noong 2002 sa lalawigan ng Sulu.