HATAW! D'yaryo ng Bayan hatawtabloid.com
ZAMBOANGA CITY – Patay ang dating municipal mayor ng bayan ng Tungawan sa lalawigan ng Zamboanga Sibugay na si Arsenio Climaco matapos tambangan ng hindi pa nakikilalang suspek sa highway ng Brgy. Guiwan sa Zamboanga City.
Ayon kay C/Insp. Elmer Acuna, hepe ng Tetuan police station 5, nangyari ang pamamaril bago magtanghali kahapon habang minamaneho ng dating alkalde ang kanilang Pajero at katabi niya ang kanyang nasugatang misis na kinilalang si Helen Climaco at apo na si Sherlimar Climaco.
Base sa ilang nakakita sa insidente, isang lala-king nakasuot ng jacket at nakasakay sa motorsiklo ang responsable sa pamamaril gamit ang caliber .45 pistol na agad din nakatakas.
Pasado 1 p.m. kahapon nang idineklara ng mga doktor na binawian na ng buhay ang dating alkalde habang pilit na isinasalba sa isang pribadong ospital.
Nasa intesive care unit (ICU) naman ngayon ang batang biktima na may malubhang tama ng bala.
Nabatid na dalawa pang menor de edad na nakaupo sa likurang bahagi ng sasakyan ang maswerteng hindi tinamaan ng bala at kasaluku-yang nasa kustodiya ng pulisya.
Ang namatay na dating alkalde ay pamangkin ng kasalukuyang mayor ng Tungawan na si Randy Climaco.
