Iniwang bagahe sa taksi nagpatrapik sa Roxas Blvd

TRAFFIC, tensiyon at takot ang idinulot ng iniwang bagahe sa loob ng isang taxi sa southbound ng Roxas Boulevard, Maynila, kahapon ng umaga.

Isinara ng mga kagawad ng Manila Police District – Bomb Squad sa mga motorista ang bahagi ng Padre Burgos hanggang T.M. Kalaw nang respondehan ang taxi driver na si Rene Cayabyab na nag-ulat na na may kahina-hinalang bagahe na iniwan sa kanyang sasakyan ang isang pasahero.

Inilikas ng mga awtoridad ang mga turistang nasa harapan ng bantayog ni Dr. Jose Rizal at ibinawal ang paglapit sa taxi.

Ayon kay Cayabyab, sumakay sa tapat ng Manila Hotel at nagpapahatid sa Makati ang babaeng pasahero.

Nagulat si Cayabyab nang pabuksan ng babae ang pinto ng taxi saka nagmamadaling bumaba at inabandona ang kanyang gamit.

Alas 10:40 a.m. nag-negatibo sa bomba ang bagahe nang masiyasat ng MPD – Bomb Squad at tumambad ang mga damit, tuwalya at passport ng isang babae sa loob ng bagahe.