HATAW! D'yaryo ng Bayan hatawtabloid.com
\AALIS bukas ang lahat ng miyembro ng PBA Board of Governors patungong Sydney, Australia, para sa dalawang araw na planning session doon mula Linggo hanggang Lunes.
Pakay ng lupon ang pag-usapan ang ilang mga bagay tungkol sa bagong season ng liga at ang pagtulong nito sa kampanya ng Gilas Pilipinas sa FIBA World Cup sa Espanya mula Agosto 30 hanggang Setyembre 14 ng susunod na taon.
Sa nasabi ring planning session ay pormal na iluluklok si Ramon Segismundo ng Manila Electric Company bilang bagong tserman ng PBA board kapalit ni Robert Non ng San Miguel Corporation.
Magiging pangunahing usapan ng PBA board ang ambisyosong pagbubukas ng bagong PBA season sa Nobyembre 17 kung saan sabay-sabay na magkakaroon ng laro sa nasabing araw na may temang “Luzon, Visayas, Mindanao: One Nation”.
Sa ilalim ng plano, gagawin ang opening ceremonies sa alas-2 ng hapon sa Smart Araneta Coliseum at susundan ito ng isang laro sa Big Dome sa alas-3 kung saan isa sa mga koponang lalaro ay ang Barangay Ginebra San Miguel.
Sa alas-5 ng hapon ay magtutunggali ang Rain or Shine at Alaska Milk sa Davao City at sa alas-7 ng gabi naman ay maghaharap ang Talk ‘n Text at Meralco sa Cebu City.
Sinabi ni PBA media bureau chief Willie Marcial na ang planong ito ay pakana ng TV5 na brodkaster ng liga.
Samantala, sinabi ng marketing director ng PBA na si Rhose Montreal na malaki ang posibilidad na ibabalik ng liga ang All-Star Weekend sa Maynila sa susunod na taon.
(James Ty III)
