HATAW! D'yaryo ng Bayan hatawtabloid.com
MUST-WIN si Manny Pacquiao sa magiging laban niya kay Brandon Rios sa November para muling makatuntong sa pedestal ng boxing.
Ayon sa ilang kritiko ng boksing, mas gutom na boksingero ngayon si Pacquiao sa nangyaring dalawang sunod na pagkatalo kina Timothy Bradley at Juan Manuel Marquez. Tulad ng isang gladiator na nasusugatan, mas lalong naghahangad ang dating hari ng pound-for-pound na makabalik sa limelight.
At kung sakaling maging matagumpay ang pagbabalik ni Pacman sa ring at talunin niya si Rios, magkakaroon siya ng pagkakataon na humiling ng rematch kay Bradley.
Dagdag pa ng mga kritiko na kung magwawagi nga si Pacquiao kay Rios, hindi na niya kailangan pang labanan si Marquez sa isang rematch dahil tinalo ito ni Bradley.
At isa pa, hindi na magiging interesante para sa boxing fans na makita ang laban nila ni Marquez na obyus namang natsambahan lang siya ng lucky punch nito. Sa nasabing laban noong nakaraang taon ay kitang-kita ang pagkagastado ni Marquez sa tinamong bugbog sa kamao ni Pacman bago dumating ang tsambang suntok niya.
Pananaw pa ng mga kritiko na si Bradley ang siyang daan para makarating sa dulo ng kanyang misyon sa boksing na makaharap si Floyd Mayweather Jr.
Pero bago ang mga senaryo na nabanggit, kailangang talunin ni Pacman ang agresibong boxer na si Rios sa isang kombinsidong panalo.
