HATAW! D'yaryo ng Bayan hatawtabloid.com
NANINIWALA ang team manager ng Meralco na si Severino “Butch” Antonio na magiging mas malakas ang Bolts sa darating na PBA Philippine Cup dahil sa pagdagdag ni Kerby Raymundo sa lineup nito.
Sa panayam sa radyo noong isang gabi, sinabi ni Antonio na ang pagdagdag kay Raymundo ay makakatulong sa ilalim ng Meralco.
Pinakawalan ng Bolts si Jay-R Reyes sa Barangay Ginebra San Miguel upang makuha si Raymundo na muling makakasama ang kanyang dating coach sa Purefoods na si Ryan Gregorio.
Bukod kay Raymundo, nagpalakas din ang Meralco dahil sa pagkuha kina Gary David at AJ Mandani mula sa Globalport, Rabeh Al-Hussaini mula sa Talk ‘n Text at Bitoy Omolon mula sa Air21.
Itinapon ng Bolts si Mac Cardona sa Express at si Chris Ross sa Batang Pier.
“I have a positive outlook about the team,” wika ni Antonio. “These are moves in the right direction because they filled up positions which the coaching staff wants. We should make the semis more often with this group.”
Pumasok ang Meralco sa semis ng PBA Governors’ Cup ngunit natalo sila sa San Mig Coffee.
Inaasahang ipapasok ni Gregorio sina Raymundo at David sa first five ng Meralco sa darating na Philippine Cup kasama sina Mike Cortez, Reynel Hugnatan at Jared Dilinger.
(James Ty III)
