Playoff sa PBA ipinagpaliban

DAHIL sa malakas na ulan na dulot ng habagat kahapon, ipinagpaliban ng PBA ang knockout na laro ng Talk ‘n Text at Barangay Ginebra San Miguel para sa huling puwesto sa quarterfinals ng Governors’ Cup na dapat sanang gawin sa Cuneta Astrodome sa Pasay.

Gagawin ang larong ito mamayang alas-7:15 ng gabi sa Smart Araneta Coliseum kung saan ang mananalo rito ay aabante sa quarterfinals kalaban ang Petron Blaze na may hawak na twice-to-beat na bentahe.

Ipinuwersa ng Tropang Texters ang nasabing knockout game pagkatapos na padapain nila ang Kings, 113-99, noong Linggo sa Mall of Asia Arena dahil sa 26 puntos ng bago nilang import na si Courtney Fells.

Magsisimula ang quarterfinals bukas sa Big Dome kung saan maghaharap ang Meralco at Barako Bull sa alas-5:15 ng hapon at San Mig Coffee kontra Alaska sa alas-7:30 ng gabi.

Sa Huwebes ay magtutunggali ang Rain or Shine kontra Globalport sa unang laro at Petron kalaban ang Ginebra o TNT sa ikalawang laro.

Bukod sa Boosters, hawak din ng twice-to-beat na bentahe sa quarterfinals ang Coffee Mixers, Bolts at Elasto Painters.            (James Ty III)