6 babae nasagip sa tourist sex parties

NASAGIP ng mga awtoridad sa operasyon kamakalawa ng gabi sa Malate, Maynila ang anim kababaihang sinasabing ibinebenta sa mga dayuhang turista para ilahok sa sex parties.

Nasagip nang pinagsanib na puwersa ng mga elemento ng Women and Children Protection Center (WCPC), Department of Social Welfare and Development (DSWD), ang kababaihan sa isinagawang entrapment operation laban sa trafficking in person dakong 6:45 p.m. sa kahabaan ng  Roxas Boulevard.

Tatlo ang naaresto sa operasyon na kinilalang sina Sonny Febra Sr., 42, at Marilou Palacio, 39, kapwa residente ng Leveriza St., Pasay City; at Rich Ortega, 24, ng Remedios St., Malate.

Ang operasyon ay isinagawa base sa natanggap na impormasyon mula sa confidential informant.

Sa isinagawang isang linggong surveillance at undercover activities, nakompirmang ang mga biktima ay ibinibenta at ginagamit ng mga dayuhang turista.

Narekober mula sa mga suspek ang P25,000 marked money bilang downpayment para sa serbisyo ng mga biktima.

“The above-mentioned suspects and the victims, together with the pieces of evidence were brought to the WCPC in Camp Crame, Quezon City for investigation and eventually filing formal charges against the suspects, and processing of the victims through the assistance of the DSWD,” ayon sa pahayag ng WCPC.