Puno nabuwal bahay nabagsakan 1 sugatan, 4 ligtas (Dahil sa eroplano?)

KALIBO, Aklan – Sugatan ang isang misis habang masuwerteng nakaligtas ang kanyang mister at tatlong anak makaraang madaganan ang kanilang bahay ng isang malaking puno ng Gemelina na nabuwal dahil sa umano’y pagdaan ng eroplano sa itaas ng kanilang bahay sa Brgy. Andagao, Kalibo, Aklan kamakalawa.

Personal na dumulog sa Kalibo PNP station si Nelson Laurel, 37, residente ng naturang lugar, at iniulat na bahagyang nasugatan ang kanyang asawang si Marissa Laurel nang tamaan ng mga kawayan.

Ayon sa pahayag ni Laurel, naghahapunan silang mag-anak dakong 6:45 p.m. nang dumaan ang hindi natukoy na eroplano na parang dumadagundong dahil sa mababang lipad nito habang palapag sa Kalibo International Airport na malapit lamang sa kanilang lugar.

Sa hindi inaasahang pangyayari, biglang nabuwal ang puno ng Gemelina at nadaganan ang bahay ng pamilya Laurel na nakatayo sa ilalim ng naturang punongkahoy.

Paliwanag ni Engr. Martin Terre, manager ng Civil Aviation Authority of the Philippines (CAAP-Aklan), imposibleng dahil sa dumaang eroplano ang pagkabuwal ng puno.

Sinabi niya na ang altitude ng eroplano kapag papalapag ay may taas na 1,200 feet.