Comelec humirit sa SC ng extension sa kaso ni Poe

HUMIRIT ang Commission on Elections sa Korte Suprema ng karagdagang panahon para tumugon sa dalawang petitions na inihain ni Sen. Grace Poe kaugnay ng kinakaharap niyang disqualification case sa 2016 presidential elections.

Ito ay makaraang maghain ng manifestation ang Solicitor General sa Korte Suprema na nagsasabing hindi nila maaring katawanin ang Comelec dahil kinakatawan na nila ang Senate Electoral Tribunal (SET) sa hiwalay na kaso ni Poe.

Sa kanilang “very urgent” manifestation, sinabi ng Comelec noong Disyembre 27 sila nakakuha ng kopya ng temporary restraining order (TRO) ng Korte Suprema, habang nitong Enero 4 lamang nakakuha ng kopya ng petitions.

Dahil dito, humirit ang Comelec ng karagdagang limang araw mula sa unang deadline na Enero 7, at nais nilang gawin ang bagong deadline sa Enero 12, 2016 para magsumite ng komento sa dalawang petitions ng senadora.

“This manifestation with very urgent motion for extension of time to file comment is not intended to delay the proceedings but based solely on the ground stated above,” ayon sa Comelec.