Armas, bala nakompiska sa gun raid sa Agusan Norte

BUTUAN CITY – Pinaghahanap ang isang babae makaraang makuha sa kanyang bahay ang iba’t ibang uri ng armas at daan-daang mga bala ng short at long firearms sa operasyon ng pulisya sa Cabadbaran City, Agusan del Norte, at mga tauhan ng Criminal Investigation and Detection Group (CIDG) Surigao del Sur kamakalawa.

Ang naturang mga armas at mga bala ay narekober sa dalawang bahay ng subject person na si Judith Ong-o Pantangco, residente ng Purok 3, Brgy. Cumagascas, Cabadbaran City.

Ayon kay Chief Insp. Gregorio Cuevas Jr., provincial officer ng CIDG-Surigao del Sur, kasama sa kanilang nakuha mula sa sinalakay na mga bahay ng suspek ang isang tig-iisang 30M1 rifle, 9mm automatic rifle, caliber 22. revolver, M16 armalite rifle, A2 caliber 556, carbine rifle, 12-gauge shotgun, at ang daan-daan rounds ng bala ng iba’t ibang uri ng long at short firearms.

Dagdag ng opisyal, matagal-tagal din nilang isinailalim sa surveillance ang suspek dahil sa paglabag sa Republic Act 10591, siyang basehan sa ipinalabas na search warrant ni Judge Sael Paderangga – presiding judge ng Branch 34, RTC, 10th Judicial Region.