Helper tinuklaw ng cobra kritikal

CAUAYAN CITY, Isabela – Kritikal ang kondisyon ng isang helper makaraang tuklawin ng cobra sa Brgy. Tagaran, Cauayan City kamakalawa.

Ang biktima ay si Joseph Mora, 37, residente ng Linao, Tuguegarao City.

Inihayag ni Ginang Angelina Mora, habang naglilinis ang kanyang anak sa kanyang silid ay kanyang nakita at aksidenteng nahawakan ang mahigit isang metrong habang cobra dulot nang matinding pagkabigla.

Sa takot ng biktima, napasigaw siya at humingi ng tulong sa kanyang among lalaki.

Pinuluputan ng cobra ang kamay ni Joseph at dalawang beses na tinuklaw sa hita, dahilan para mawalan ng malay.

Ayon kay Gng. Mora, sinabi sa kanya ng doktor na mahina ang pintig ng puso ng anak at hanggang ngayon ay hindi pa bumabalik ang kanyang malay.

Ang cobra ay pinagpapalo ng kahoy hanggang mamatay ng amo ng biktima.

Mayroong butas sa lupa malapit sa kuwarto ng biktima na maaaring pinamahayan ng cobra na pumasok sa silid ni Mora.