Kemikal tumagas sa QC factory, alingasaw umabot sa Pasig

UMALINGASAW ang paligid ng Brgy. Bagumbayan sa Quezon City dahil sa pagtagas ng kemikal mula sa isang pabrika nitong Linggo ng hapon.

Nagmula ang alingasaw sa Chemrez Technologies, Inc. sa Calle Industria at umabot hanggang sa ilang lugar sa Pasig. 

Ayon kay Jill Osina, Corporate Pollution Control Officer ng Chemrez Technologies, Inc., “fumes” o asó ang nagdudulot ng masangsang na amoy.

Paliwanag ni Osina, “(Styrene) monomer is supposedly liquid na nag-solidify. Habang nagso-solidify, nagke-create ng heat and itong heat na ito, magke-create siya ng fume. Iyong fumes, nagbigay ng di magandang amoy sa paligid.”

Dagdag niya, ngayon lamang naganap ang pag-alingasaw sa pabrika.

Kasalukuyan na aniyang pinaandar ang lahat ng control systems upang tuluyan nang maglaho ang amoy.

Ayon sa Bureau of Fire Protection at Disaster Risk Reduction and Management Office ng Quezon City, hindi napanatili nang maayos ang temperatura ng kemikal kaya ito nagbuga ng asó. 

Gayonman, wala anilang peligrong sumabog ang kemikal at hindi rin ito makasasama sa kalusugan.