1 patay, 8 sugatan sa sagupaan sa Maguindanao

COTABATO CITY – Maraming mga sibilyan ang nagsilikas nang sumiklab ang sagupaan ng Moro National Liberation Front (MNLF) at militar sa probinsiya ng Maguindanao kamakalawa.

Ayon sa ulat ng pulisya, hinarang ng MNLF sa pamumuno ni Kumander Kamlon, ang proyekto ng isang private company sa Brgy. Bungabong, Sultan Mastura, Maguindanao.

Agad nagresponde ang mga sundalo para magbigay ng seguridad ngunit pinaputukan sila ng MNLF.

Tumagal nang halos pitong oras ang enkwentro ng MNLF at mga tauhan ng 37th Infantry Battalion Philippine Army kaya lumikas ang maraming sibilyan.

Humupa ang putukan nang dumating ang mga lokal na opisyal, pulisya at mga opisyal ng MNLF.

Tatlo ang napaulat na nasugatan sa mga sundalo habang isa ang namatay, at lima ang nasugatan sa MNLF.

Nilinaw ni Komander Kamlon, pinasok ng mga sundalo ang kanilang kampo kaya napilitan silang magpaputok at lumaban.

Nagpapatuloy ang negosasyon ng mga opisyal sa probinsya ng Maguindanao para maresolba ang naturang gusot.