Pemberton hahatulan sa Nob. 24

KINOMPIRMA ng Olongapo City Regional Trial Court (RTC) Branch 74,  naitakda na nila sa susunod na linggo ang pagbaba ng hatol kay US Marine Lance Corporal Joseph Scott Pemberton. 

Si Pemberton ang sinasabing nakapatay sa Filipino transgender na si Jeffrey Laude alyas Jennifer.

Itinakda ng korte ang paglabas ng verdict sa Nobyembre 24, 2015, dakong 1 p.m.

Ayon kay Judge Roline Ginez-Jabalde, nakompleto na nila ang mga kailangang impormasyon kaya wala nang hadlang para maibaba ang hatol.

Nabatid na nitong Setyembre nang tapusin ng korte ang pagdinig sa nasabing kaso makaraang magharap ng mga testigo at ebidensya ang magkabilang panig.