Mison tameme sa ‘Greencard’ holder issue

ISANG mahabang dead air ang tila naging sagot ni Bureau of Immigration (BI) Commissioner Siegfried Mison nang tanungin nang direkta sa isang radio program kung siya’y United States greencard holder.

Ngunit imbes sagutin ng oo o hindi, isang mahabang dead air ang namagitan kay Mison at sa radio program host ng Lapid Fire sa DZRJ 810 Khz kahapon dakong 9:00 ng umaga.

Nang mapansin na kapuna-puna na ang dead air sinabi ni Mison, “I’m not in liberty to divulge.”

Aniya, may record umano ang BI at ang US Citizenship and Immigration Services (USCIS) na makapagsasabi kung siya’y isang US greencard holder.

Ang Permanent Resident Card o greencard na inisyu ng US government sa isang tao ay nagpapatunay ng permanenteng paninirahan o pagiging immigrant sa Estados Unidos.

Itinatadhana sa Section 18, Article XI ng 1987 Constitution na ang sino mang opisyal at kawani ng pamahalaan ay dapat parusahan kapag nagpalit ng citizenship o nakakuha ng immigrant status sa ibang bansa.

“Public officers and employees owe the State and this Constitution allegiance at all times, and any public officer or employee who seeks to change his citizenship or acquire the status of an immigrant of another country during his tenure shall be dealt with by law.”