Resolusyon sa kaso ni Poe aapurahin ng Comelec

BALAK ng Comelec na madaliin ang pagpapalabas ng desisyon sa mga kaso ng disqualification laban kay Senadora Grace Poe-Llamanzares, isa sa mga kandidato sa pampanguluhang halalan sa susunod na taon.

Naniniwala si Comelec Chairman Andres Bautista, mas mabuting pagpasyahan agad ang mga kaso laban sa senadora  para sa halalan at maging sa demokrasya.

Iginiit niya na kailangan agad lutasin ang mga disqualification case ni Mrs Poe-Llamanzares dahil maaari rin kuwestiyonin ng senadora ang Comelec decision sa Kataas-taasang Hukuman.

Matatandaan, ilang disqualification cases na ang kinakaharap ng senadora dahil sa usapin ng citizenship at residency.

Isa sa disqualification cases na kinakaharap ni Poe-Llamanzares ay may kinalaman sa kuwalipikasyon niya bilang senadora, na isinampa laban sa kanya ni presidential aspirant Rizalito David.

Ang tatlong iba pa ay may kinalaman sa kanyang kandidatura sa pagka-pangulo.

Unang nagsampa si Atty. Estrella Elamparo, dating legal counsel ng Government Service Insurance System (GSIS) ng petition to cancel Certificate of Candidacy (CoC) laban kay Poe, na sinundan ng kasong inihain ni Professor Antonio Contreras.

Sinampahan din siya ni dating Senador Francisco ‘Kit’ Tatad ng disqualification case.

“Ako, ang aking pakiusap nga sa ating mga kasama sa en banc, kung puwede lang bilisan namin, kasi alam rin naman namin na kung ano man ‘yung aming magiging desisyon, puwedeng iapela sa ating Korte Suprema,” pahayag ni Bautista.