10 namatay sa Leyte Penal Colony kinilala na

TACLOBAN CITY- Kinilala na ng Bureau of Fire Protection-Abuyog Leyte ang 10 bilanggo na namatay sa sunog sa Leyte Penal Colony noong Oktubre 8, 2015.

Ayon kay SFO3 Eric Barcelo, Ground Commander ng nasabing insidente, ang nasabing narekober na mga bilanggo ay ‘beyond recognition’ o sunog na sunog na kaya hindi na makikilala pa ng kani-kanilang pamilya.

Sila ay sina Gerry Sorilla y Bagro, 47; Roel Oclaret y Palban, 59; Tito Ejada y Lacre, 59; Salvador Erlandia y Balindo, 59;  Randy Silvestre y Fernando, 43; Orlando Sorlasa y Sudario, 43; Delfin Samaco y Abrela, 61; Eugenio Monforte y Robante, 29; Rolando Agda y San Francisco, 31;  at Susano Patio y Garcia, 51.

Base rin sa inisyal na imbestigasyon ng BFP, aabot sa P2 milyon ang kabuuang danyos sa nasabing sunog.

Nilinaw rin ni Barcelo na hindi sa banyo ng Building 1 ng maximum security compound kundi sa Emergency Shelter ng mga bilanggo nagsimula ang sunog.

Sa ngayon, hinihintay nila na dumating ang mga kinatawan ng BFP National Headquarters para pumasok na rin sa imbestigasyon.

NBP Chief personal na sisiyasat sa nasunog na penal colony

SISIYASATIN ng hepe ng National Bilibid Prison (NBP) ang Leyte Regional Prison, ilang araw makaraan ang malagim na sunog na ikinamatay ng 10 katao.

Ayon kay Supt. Geraldo Aro, ang officer-in-charge ng kulungan, personal na tutungo si NBP Superintendent Richard Schwarzkopf upang magsagawa ng inspeksiyon.

Kabilang sa aalamin ni Schwarzkopf ang kalagayan ng 1,000 bilanggo na naapektuhan ng sunog.