3 sundalong rapist ng Lumad isasalang sa court martial

INIREKOMENDA ng Civil Military Office ng 10th Infantry Battalion na isailalim sa court martial proceedings ang tatlong sundalo na gumahasa ng isang 14-anyos dalagitang Lumad sa Davao del Norte.

Pinatawan na rin ng preventive suspension ang tatlong sundalo habang nagpapatuloy ang imbestigasyon.

Una rito, nagsumbong ang biktima sa mga tauhan ng Department of Social Welfare and Development (DSWD) na nagsagawa ng rescue operation sa mga Lumad, hinggil sa  pang-aabuso ng tatlong sundalo.

Habang nagtipon-tipon ang mga babaeng Lumad sa labas ng Eastern Mindanao Command sa Panacan, Davao City para ipakita ang kanilang pagkadismaya sa mga sundalo at ipinanawagan ang paghingi ng hustisya para sa biktima.

Sinasabing aabot na sa limang kaso ng rape ang naitala sa Davao region na kinasangkutan ng mga sundalo.