Japanese national kinidnap

PERSONAL na dumulog sa Manila Police District-General Assignment and Investigation Section (MPD-GAIS) ang isang 46-anyos Japanese national makaraan makidnap ng hindi nakikilalang mga suspek sa Roxas Blvd., Malate, Maynila nitong Lunes, Agosto 10.

Kinilala ang biktimang si Hideaki Okozaki, may asawa, negosyante, nakatira sa Robinsons Tower 1, Room 11-H, Pedro Gil St., Ermita, Maynila.

Sa imbestigasyon ni PO2 Randolf Pellesco, dumating si Okozaki sa GAIS kahapon kasama ang kaibigan niyang kapwa Japanese national na si Osema Ikeda, at isang nagngangalang Jerry Sucna-an, taxi driver ng Venzon Taxi Company, residente ng 38 Riverside, MIA Rd., Tambo, Parañaque City, upang i-report ang insidente.

Ayon sa salaysay ng biktima, siya sa isang taxi patungo sa isa pa niyang kaibigang kapwa Japanese. Habang tinatahak ang kahabaan ng Roxas Boulevard ay huminto ang taxi sa tapat ng Grand Boulvard Hotel at iniwan ng driver ang taxi.

Pagkaraan ay tinutukan siya ng baril at piniringan ang kanyang mga mata. Iginapos din aniya ang kanyang mga kamay at binalaan na siya’y papatayin kapag pumalag.

Kahapon ng umaga ay itinapon aniya siya sa Quirino Avenue, Parañaque City saka tumakas ang mga suspek.

Leonard Basilio, may kasamang ulat nina Rhea Fe Pasumbal, Anne  Marielle   Eugenio, Beatriz Pereña, At Angelica Ballesteros