Mary Jane ‘di masasagip ng kaso vs recruiters

MALABONG pagbigyan ng Indonesian government ang ano mang kahilingan na mapalaya si Mary Jane Veloso, ang Filipina na hinatulan ng kamatayan dahil sa drug smuggling, pahayag ni Attorney General M. Prasetyo, ayon sa ulat ng Jakarta Post kahapon.

Ayon sa ulat, sinabi ni Prasetyo, malabong mapigilan ng legal proceedings sa Filipinas, ang pagpapatupad ng parusang bitay kay Veloso.

Ang tinutukoy niya ay isinasagawang paglilitis sa mga recruiter ni Veloso sa Filipinas.

“Any request to free Mary Jane (Veloso) would be difficult to realize as she has been proven to have smuggled heroin into the country,” ayon sa attorney general.

Si Veloso, sinabing nagoyo siya sa pagdadala ng heroin sa Indonesia noong Abril 2010, ay itinakdang bitayin noong Abril 29 ngunit iniliban ng Indonesian government ang pagsalang sa kanya sa firing squad nang ituring siyang testigo sa human trafficking case laban sa kanyang mga recruiter.

Ngunit sinabi ni Prasetyo, kapag napatunayang guilty ang sinasabing recruiter ni Veloso na si Maria Kristina Sergio sa kasong human trafficking, maaari itong magamit ni Veloso bilang “new evidence to be considered in a case review or clemency appeal.”