Senglot namugot 1 pa sugatan (Sinapian ng masamang espirito)

 NAPAAGA ang kamatayan  ng isang lalaki makaraan siyang pugutan ng kanyang kainoman na sinasabing sinapian ng masamang espirito kamakalawa ng gabi sa Meycauayan City.

Kinilala ang pinugutan na si Ronald Frago, 42, welder, habang inoobserbahan sa Bulacan Medical Center  ang malubhang nasugatan na si Jerry Ruiz, 47, tricycle driver, kapwa nakatira sa Brgy. Longos, sa naturang lungsod. 

Agad nasakote ang suspek na si Danilo Jimenez, 34, ng Col. Castro Street, malapit lamang sa tirahan ng mga biktima.

Batay sa ulat mula sa Meycauayan City Police, nabatid na nakikipag-inoman ang mga biktima sa bakuran ng suspek kasama ang iba pang mga kaibigan.

Sa hindi malamang dahilan, biglang pumasok sa kanyang bahay ang suspek at nang bumalik ay may hawak nang samurai at pinugutan ang biktima na noon ay nakatulog sa mesa dahil sa matinding kalasingan.

Tangkang awatin ni Ruiz ang suspek ngunit maging siya ay hinataw ng taga ng samurai ng salarin.

Pagkaraan ay nagtangkang tumakas ang suspek ngunit nasakote ng nagrespondeng mga awtoridad.

8 estudyante sinaniban ng bad spirit (Sa Cebu City)

CEBU CITY – Ikinababahala ng pamunuan ng Sugtunggan Night National High School Brgy. Basak Lungsod ng Lapu-Lapu lalawigan ng Cebu, ang sinasabing pagsanib sa walong estudyante ng masamang espirito simula nitong Lunes hanggang Huwebes.

Ang walong biktima ay kinabibilangan ng first year at second year high school students.

Ayon kay Gilbert Ereguela, isa sa mga guro ng mga biktima, ‘alarming’ na ang mga kababalaghang nangyayari sa nasabing paaralan.

Tuwing sasapit aniya ang 8:30 p.m. ay may higit sa isang estudyante ang napo-possess sa kalagitnaan ng kanilang klase gaya nang nangyari kamakalawa ng gabi at sa nakaraang mga gabi.

Dagdag ni Ginoong Ereguela, sa nakalipas na mga pangyayari ay kaya pa nilang daanin sa dasal ang bagsik ng masamang espirito, ngunit kamakalawa ng gabi ay kahit anim na tanod sa isang estudyante ay nahihirapan nang kontrolin ang lakas ng biktima.

Sumisigaw aniya ang mga biktima ng katagang “Sinira ninyo ang aming tahanan at walang panginoon!”

Kaugnay nito, sinabi ng mga kaklase na maaaring dahil ang insidente sa pinutol na puno ng Gmilena at bagong bukas na balon.