HATAW! D'yaryo ng Bayan hatawtabloid.com
MATAPOS ang walong buwang detensiyon, nakalaya ang isang beteranong aktibista sa isla ng Panay mula sa isang piitan sa bayan ng Pototan, lalawigan ng Iloilo.
Ayon sa Bagong Alyansang Makabayan-Panay, pinalaya si Elmer Forro, secretary general, noong Miyerkoles, 7 Disyembre, sa Iloilo District Jail, sa nabanggit na bayan.
Nilagdaan ni Judge Redentor Esperanza mula sa isang korte sa bayan ng Janiuay, Iloilo ang order ng pagpayag sa paglalagak ng piyansa ni Forro para sa kasong murder.
Inaresto si Forro noong buwan ng Mayo ng Armed Forces of the Philippines (AFP) at Philippine National Police (PNP) sa paratang na pagkakasangkot niya sa isang enkuwentro noong Abril 2020 sa Lambunao, Iloilo na ikinamatay ng isang sundalo ng Philipping Army.
Pahayag ng Bayan-Panay, “Notoryus ang PNP at AFP sa paggawa ng mga aktibista gamit ang mga pekeng testimonya at mga itinanim na ebidensiya.”
Pinasinungalingan ng grupo ang mga paratang ng Philippine Army na para sa kanila ay isang pagtatangka para patahimikin sila.
Ayon sa grupo, wala si Forro sa Lambunao at nasa ibang lugar para sa isang medical mission sa mga urban poor.
Pansamantalang pinalaya si Forro ilang araw bago ang komemorasyon ng International Human Rights Day noong Sabado, 10 Disyembre.
