NAGHAIN ng reklamo ang Department of Social Welfare and Development (DSWD) sa Office of the Ombudsman laban sa ilang barangay officials sa Iloilo City na sinabing sangkot sa anomalya ng ‘pagkakaltas’ ng cash aid sa ilalim ng Assistance to Individuals in Crisis Situation (AICS) ng DSWD.
Nagtungo si DSWD Secretary Rex Gatchalian sa Ombudsman para magsampa ng administrative complaints, kabilang ang grave misconduct, paglabag sa Anti-Graft and Corrupt Practices Act, at sa Ethical Standards for Public Officials and Employees laban sa 14 barangay officials mula sa Jaro at Arevalo, Iloilo City.
Ayon kay Gatchalian, 14 benepisaryo ang nagreklamong nabawasan ang kanilang ayuda sa mga payout na isinagawa ng DSWD-AICS noong 7, 11, at 12 Nobyembre.
Batay sa kuwento ng mga nagreklamo, matapos matanggap ang P10,000 AICS cash aid ay pinilit silang ibigay ang P8,000 sa ilang opisyal kaya P2,000 na lamang ang natira sa kanila.
Hiniling ng DSWD ang preventive suspension ng mga sangkot na opisyal habang nagpapatuloy ang imbestigasyon.
Tiniyak ni Sec. Gatchalian na titindigan ng ahensiya ang mga kasong isinampa, habang inihahanda ang kaukulang criminal charges laban sa lahat ng responsable. (HNT)
