HATAW! D'yaryo ng Bayan hatawtabloid.com
ALAM MO NA!
ni Nonie Nicasio
ANG Movie and Television Review and Classification Board (MTRCB) Chairperson at CEO na si Lala Sotto ay nakipagpulong kamakailan sa mga kinatawan ng The Walt Disney Company (Southeast Asia) Pte. Limited (Disney+), Warner Bros. at HBO.
Ito’y bahagi ng partisipasyon ni Sotto sa AVIA conference sa Singapore. Ipinahayag ng mga Subscription Video On Demand (SVOD) services ang kanilang interes na makipagtulungan sa MTRCB upang higit pang mapalakas ang mga inisyatiba para sa responsableng panonood sa Filipinas.
“Isang produktibo at makabuluhang pagpupulong ang nangyari kasama ang Disney+, Warner Bros. at HBO. Nakatutuwa dahil lahat sila ay nagpahayag ng interes na makipagtulungan sa MTRCB sa pagsusulong ng responsableng panonood at paggamit ng media,” sabi ni Sotto.
Ibinahagi rin ni Sotto na nag-alok ang mga kompanya na ipagamit sa MTRCB ang mga iconic na karakter at tema mula sa mga tanyag na palabas tulad ng Harry Potter, DC, at Looney Tunes para sa kampanya ng responsableng panonood at sa pagpapalakas ng media literacy sa buong Filipinas sa gitna ng mabilis na pagbabago ng media.
Ibinahagi ng Warner Bros. at HBO na mayroon na silang pakikipag-ugnayan sa iba’t ibang ahensiya ng pamahalaan, kabilang ang Department of Tourism at SK Tourism Board, bilang patunay ng kanilang matibay na suporta sa mga inisyatiba ng gobyerno.
Sa pakikipag-usap sa Disney+, hinikayat nitong bumuo ng working group kasama ang MTRCB upang matiyak na ang lahat ng Disney+ content na ilalabas sa Filipinas ay sumusunod sa wastong ratings, advisories at consumer guidance na naaayon sa pamantayan ng MTRCB.
Ipinakita rin ng Disney+ ang kahandaang makipagtulungan sa isang posibleng public service infomercial na gagamitan ng mga karakter mula sa Disney tulad ng Marvel, Pixar at iba pa.
Layunin ng kampanyang ito na isulong ang digital media literacy, itampok ang kahalagahan ng parental controls, at palakasin ang kaalaman sa angkop na klasipikasyon upang maprotektahan ang mga batang manonood.
“Malaki ang maiaambag ng posibleng pakikipagtulungang ito sa pagpapalawak ng aming kampanya para sa responsableng panonood sa buong bansa,” wika pa ni Sotto.
