HATAW! D'yaryo ng Bayan hatawtabloid.com
NAGHAIN ng reklamo si dating Liga ng mga Barangay Manila president Leilani Lacuna, na kapatid ni dating Mayor Maria Sheilah “Honey” Lacuna, ng graft at grave misconduct sa Office of the Ombudsman laban kay Manila Mayor Francisco “Isko Moreno” Domagoso, Manila Vice Mayor Chi Atienza, at 13 iba pa, nitong Martes ng umaga.
Sa press conference, sinabi ni Lacuna, ang kanilang aksiyon ay dahil sa ‘ilegal na pag-alis’ sa kanya sa posisyon bilang pangulo ng Manila chapter ng Liga ng mga Barangay.
“Ako po ay nag-file ng kaso laban sa ilang opisyal ng Maynila dahil po sa ilegal na pagpapatanggal po sa akin. Ito po ay hindi dumaan sa due process. Ako po ay ang ex-officio ng City Council ng Maynila dahil ako po ay lehitimong Liga president po ng Maynila,” pahayag ni Lacuna.
“Ayoko pong isipin na politika. Siguro naman po, hindi po lingid sa iba na ang kapatid ko po ay ang dating mayor Honey Lacuna. Ako na lang po ang natitira na Lacuna sa City Hall po. So, hindi ko po alam. Gusto ko rin pong tanungin kung bakit po nila ako gustong tanggalin at ginawa po nila ‘yun sa ilegal na paraan,” paglilinaw niya.
Ang iba pang mga respondents ay kinabibilangan ni Manila 5th District Councilor Jaybee Hizon, dating Manila Barangay Bureau OIC Joel Par, at 10 bagong halal na opisyal ng Liga ng mga Barangay sa Maynila.
Bukod sa graft, isa pang criminal complaint ang isinampa dahil sa usurpation of official functions sa ilalim ng Article 177 ng Revised Penal Code.
Samantala, ang administrative complaints, ay dahil sa grave misconduct and grave abuse of authority.
Binigyang-diin ni Lacuna na ilegal ang halalan para sa mga bagong opisyal ng Liga ng mga Barangay sa Maynila dahil sa kawalan ng kinatawan mula sa Department of the Interior and Local Government (DILG).
“Ayon mismo sa by-laws ng Liga ng mga Barangay, malinaw ang proseso ng pagtanggal o pag-alis ng opisyal — dapat may pormal na kasong inihain sa National Liga at mayroong due process o pagkakataon para makapagpaliwanag ang inaakusahan,” nakasaad sa reklamong inihain sa Ombudsman ng grupo ni Lacuna. (HNT)
