HATAW! D'yaryo ng Bayan hatawtabloid.com
NAGSASAGAWA ng isang malalimang imbestigasyon ang Land Transportation Office (LTO) sa isang Chinese national upang matukoy ang koneksiyon nito na may kinalaman sa nagbenta ng sold luxury cars sa mag-asawang kontratista na sina Pacifico at Cezarah Discaya.
Ayon kay LTO chief, Assistant Secretary Markus Lacanilao, nais nilang matukoy kung mayroong kaugnayan ang naturang Chinese national sa car dealer na Frebel Enterprises na sinasabing nag-supply ng luxury cars sa pamilya Discaya.
Kinilala ang naturang Chinese national na si Cheng Cao, nagma-may-ari ng ACH High-End Motor Center na matatagpuan sa lungsod ng Makati na noong Pebrero ng nakaraang taon ay ni-raid ng Bureau of Customs (BoC).
Si Cao ay pinaghihinalaang bahagi ng isang malaking sindikato na may kaugnayan sa talamak na smuggling ng luxury cars sa bansa.
Sa loob ng isang linggong pag-upo ni Lacanilao bilang LTO chief ay kanyang ipinagmalaki na nakapag-impound na sila ng mga luxury vehicles kabilang dito ang Ferrari 458, Lamborghini Urus, at Lamborghini Huracán.
“All of them had one importer, Frebel, which was the same importer of the Discayas, that were registered with the National Capital Region (NCR),” ani Lacanilao.
Magugunitang sa isang pagdinig sa Senado, tinukoy ni Discaya ang Frebel Enterprises bilang isa sa mga nabilhan nila ng sasakyan.
Dahil dito agad na nakipag-ugnayan ang LTO sa Customs upang matukoy ang ugnayan ni Cao at ng Frebel.
May suspetsa na ang Frebel ang siyang supplier ni Cao ng mga ibenebenta nitong luxury cars sa kanyang mga kliyente.
Iniimbestigahan na rin ng LTO at BoC ang mga luxury cars na naka-display sa showroom ni Cao na sinabing imports ng Frebel.
Nag-ugat ang imbestigasyon matapos kumilos ang LTO at Philippine National Police-Highway Patrol Group (PNP-HPG) para maaresto si Cao na inireklamo at sinampahan ng kaso ng kanyang dating tauhang Filipino sa pamamagitan ng tanggapan ni Senador Erwin Tulfo sa LTO.
Sa pagkakaaresto kay Cao ay nakuhaan siya ng baril na walang lisensiya at napuna na ang kaniyang asul na Mercedez Benz ay hindi tugma sa nilalaman ng mga papeles ng sasakyan.
Suspetsa ni Lacanilao, itinatago nito ang tunay na pagkakakilanlan kung kaya gumamit ng pekeng lisensiya.
Tinukoy ni Lacanilao na karamihan sa kliyente ni Cao ay pawang konektado sa mga nagpapatakbo ng Philippine Offshore Gaming Operators (POGO) sa bansa.
Kasalukuyang nakakulong sa Camp Crame si Cao samantala ang kanyang Mercedez Benz ay nasa pangangalaga ng LTO.
Agad nakipag-ugnayan ang LTO sa Bureau of Immigration (BI) upang matukoy ang tunay na pagkakakilanlan ng suspek. (NIÑO ACLAN)
