‘Shabu’ pinalitan ng tawas tulak patay sa boga ng ‘suki’

ISANG hinihinalang kawatan at tulak ng ilegal na droga ang binaril at namatay sa katanghaliang tapat nitong Biyernes, 25 Nobyembre, sa Purok Kingfisher A, Brgy. 16, lungsod ng Bacolod, matapos magbenta ng pekeng shabu nitong Huwebes, 24 Nobyembre.

Kinilala ng pulisya ang pinaslang na ‘tulak’ na si Mark Christian John Luceño, 31 anyos, residente sa Brgy. 35, sa nabanggit na lungsod.

Ayon kay P/Maj. Ramel Sarona, hepe ng Police Station 1, nakaupo si Luceño sa isang pedicab nang dumating ang isang lalaking sakay ng motorsiklo saka biglang binaril ang biktima sa kanyang ulo na agad nitong ikinamatay.

Lumabas sa imbestigasyon na nakipagtalo ang biktima noong Huwebes sa kanyang ‘suki’ na nagreklamong binentahan ng tawas imbes shabu.

Ani Sarona, kabilang ang biktima sa kanilang drugs watchlist at may mga nakatalang kaso ng pagnanakaw sa Brgy. 16, 35, at sa iba pang kalapit na barangay.

Nabatid na dati nang nakulong si Luceño at kalalaya pa lamang.