HATAW! D'yaryo ng Bayan hatawtabloid.com
NATAGPUAN ang hubong katawan ng isang 15-anyos dalagitang miyembro ng LGBT sa isang madamong bahagi ng Brgy. Gairan, lungsod ng Bogo, lalawigan ng Cebu, nitong Linggo, 13 Nobyembre.
Kinilala ang biktimang si Jeanelle Maekylla Royos, 15 anyos, residente sa Brgy. Gairan, sa nabanggit na lungsod.
Nabatid ng pulisya, natagpuan ng isang babaeng nagpapastol ng kanyang kambing ang katawan ni Royos dakong 3:00 pm kamakalawa.
Ayon kay P/Lt. Col. Florendo Fajardo, hepe ng Bogo CPS, natunton ang nilalangaw na katawan ng biktima dahil sa umaalingasaw na amoy na nagmumula rito.
Dagdag ni Fajardo, dumalo ang biktima kasama ang kanyang 19-anyos nobya sa isang handaan noong Biyernes ng gabi, 11 Nobyembre at nagpasyang umuwi hatinggabi ng Sabado.
Ayon sa nobya ng biktima, sabay silang umalis ng handaan ngunit naghiwalay din pauwi sa kani-kanilang mga bahay.
Aniya, hindi sumagot si Royos nang nag-chat siya sa Facebook messenger pagkauwi niya.
Patuloy ang imbestigasyon ng mga awtoridad upang matukoy kung mayroong foul play sa pagkamatay ng biktima. ###
