Ilang araw nang nawawala
ESTUDYANTE NATAGPUANG WALANG BUHAY SA DAMUHAN

WALA nang buhay at nagsisimula nang maagnas ang katawan ng isang college student nang matagpuan sa madamong bahagi sa gilid ng Venecia Highway sa lungsod ng Dagupan, lalawigan ng Pangasinan.

Kinilala ang biktimang si Aaron Fernandez, 20 anyos, residente sa Brgy. Poblacion Oeste, sa nabanggit na lungsod, at 2^nd year hospitality student.

Ayon sa ama ng biktima na si Anthony, naghahanap sila ng puwedeng tumulong sa kanila upang mabigyan ng hustisya ang anak. Hinanap nila kung saan-saan ang mga kakilala na puwedeng mahingan ng tulong para sa hustisya ng anak.

Inilarawan ng ama ng biktima na malambing, magalang, at mapagmahal na anak noong siya ay nabubuhay pa.

Batay sa imbestigasyon ng pulisya, noon pang 14 Hunyo umalis ng kanilang bahay ang biktima at simula noon ay hindi na nakauwi.

Nakita umano ang biktima na sumakay ng kotse paalis ng barangay.

May nakita ring sugat sa ulo ng biktima na posible umanong dahil sa pagpalo ng matigas na bagay.

Patuloy ang imbestigasyon upang matukoy ang motibo sa pagpaslang sa biktima at mayroon na rin person of interest ang pulisya.

Ayon kay P/Lt. Col. Abubakas Mangelen, Jr., hepe ng Dagupan CPS, isinailalim sa awtopsiya at DNA ang labi ng biktima.

Inihayag ni P/Maj. Ria Tacderan, Acting PIO ng Pangasinan PPO, isang 29-anyos lalaki ang umaming  siya ang responsable sa pagkawala ni Aaron.

Tumanggi munang ihayag ni Tacderan ang pangalan ng lalaki habang patuloy pa ang imbestigasyon.