HATAW! D'yaryo ng Bayan hatawtabloid.com
ISANG truck driver ang binawian ng buhay matapos barilin ng dalawang hindi kilalang suspek sa gitna ng mainitang pagtatalo sa kalsada sa Brgy. Fermin, sa lungsod ng Cauayan, lalawigan ng Isabela, nitong Huwebes, 19 Mayo.
Agad nagsagawa ang mga tauhan ng Cauayan CPS ng manhunt operation laban sa mga suspek sa pamamaril sa biktimang kinilalang si Danilo Bramaje, 42 anyos, isang truck driver.
Ayon sa ulat ng PRO2 PNP, nagkainitan habang nagtatalo ang truck driver at ang isa sa mga suspek na parehong patungo sa direksiyon patungong timog ng kalsada.
Nang makarating sa tapat ng gasolinahang Sea Oil, bumaba ang suspek na nagmamaneho ng itim na motorsiklong walang plaka at ang kanyang angkas na bumunot ng baril saka pinaputukan ang biktimang agad binawian ng buhay.
Narekober ang dalawang basyo ng bala ng kalibre .45 sa pinangyarihan ng krimen.
“Bigla na lang nagkakagulo sa kalsada at doon nalaman namin na may nabaril pala matapos ang umano’y gitgitan at sagutan sa kalsada at lahat nagulat,” salaysay ng isang motoristang nakasaksi sa insidente.
