HATAW! D'yaryo ng Bayan hatawtabloid.com
IBAYONG pagbabago, at maraming reporma para sa QCitizens ang pangakong binitiwan ni Quezon City Mayor-elect Joy Belmonte bilang pasasalamat sa iginawad sa kanyang pangalawang termino ng mga mamamayan ng lungsod.
Sa kanyang mensahe ng pasasalamat, nangako si Belmonte na “mas pinaigting na serbisyo” ang manggagaling sa pamahalaang lungsod.
“Buong pagpapakumbaba po akong nagpapasalamat sa ating mga QCitizens sa pagbibigay muli ng tiwala at suporta sa ating nasimulang pagbabago,” ang pahayag ng Mayora.
Aniya, ang kanyang mga botong natamo ay “malinaw na patunay” na nararamdaman ng mga QCitizens ang mga programa at mga proyekto ng kanyang administrasyon sa nakalipas na tatlong taon.
“Senyales din ito na nais ninyong ipagpatuloy ang mga reporma at pamahalaan ang City Hall,” paliwanag pa ni Belmonte.
“Ngayong pinagkatiwalaan ninyo ako na muling pangunahan ang Quezon City sa susunod na tatlong taon, asahan ninyo ang mas pinaigting na serbisyo mula sa inyong pamahalaang lungsod. Patuloy nating isasaayos ang mga luma at baluktot na Sistema. Sa abot ng ating makakaya paglilingkuran natin ang lahat ng QCitizens sinoman ang kanilang ibinoto ngayong halalan,” pangako ni Belmonte.
Dagdag pa niya hihigitan nila ang mga nagawa na, sa tulong ng kanyang mga Kasama sa partidong Serbisyo sa Bayan Party (SBP) sa pangunguna ni Vice Mayor Gian Sotto, mga Kongresista at mga Konsehal.
“Tinitiyak ko na sa aming pagtutulungan, kasama ang bawat QCitizens sa pag-unlad. At sa ating pagkakaisa, patuloy na aangat ang ating mahal na lungsod. Muli marami pong salamat sa tiwala” ang pagtatapos ni Belmonte.
