HATAW! D'yaryo ng Bayan hatawtabloid.com
SA GITNA ng walang tigil na ulan, nagtipon ang hindi bababa sa 200 mangingisda mula sa isang coastal barangay sa bayan ng Consolacion, sa hilagang bahagi ng lalawigan ng Cebu nitong Linggo, 7 Nobyembre, upang ipahayag ang kanilang pagkontra sa proposed reclamation project na itinutulak ng mga opisyal ng bayan katuwang ang isang pribadong consortium.
Nagtipon ang mga nagprotestang mangingisda mula sa Sitio Baha-Bah, sa Brgy. Tayud, sa dalampasigan dakong 6:00 am kahapon, dala ang mga poster gawa sa cartolina kung saan nila isinulat ang kanilang mga hinaing laban sa 235.8-ektaryang reclamation project.
Sa gitna ng kanilang protesta, nagsimulang bumuhos ang ulan pero hindi nagpatinag ang mga kalahok, kaya imbes umuwi ay sinamahan ng mga mangingisda mula sa mga lungsod ng Mandaue at Lapu-Lapu.
Nanguha ng shellfish at mga alimango sa dalampasigan ang mga mangingisda bilang patunay na maraming yamang-dagat sa nabanggit na lugar.
Kalaunan, niluto nila ang mga tinipon at kinain para sa kanilang agahan.
Sa pag-aaral na isinagawa ni Dr. Filipina Sotto ng FBS-Environment and Community Research and Development Services, ‘think tank’ na nakabase sa Cebu at nakatuon sa mga isyung pangkalikaasan, sinabi niyang ang lugar ay sagana sa yamang-dagat kabilang ang 75 uri ng corals at pitong uri ng bakawan.
Nagbabala si Sotto sa hindi na maibabalik na pinsala sa yamang-dagat kung maisasakatuparan ang proyektong tinaguriang “Seafront City.”
Samantala, lumagda ang mga mangingisdang lumahok sa kilos-protesta ng hiwalay na petisyon para kay Pangulong Rodrigo Duterte na humihiling ipatigil ang proyekto.
Nabatid na ito ang ikatlong petisyong ipinadala ng grupo sa pangulo.
Nilagdaan ang unang petisyon ng higit sa 2,000 manggagawa ng hindi bababa sa pitong shipyard na maaapektohan ng naturang proyekto.
Gayondin, nagpadala ng petisyon sa pangulo ang mga residente ng Brgy. Tayud, kabilang ang mga may-ari ng mga karinderya at boarding house, na ang kabuhayan ay nakadepende sa operasyon ng mga shipyard sa lugar.
Sa pangatlong petisyon, pumirma ang mga mamamalakaya ng barangay para iprotesta ang proyektong maaaring makaapekto sa kanilang kabuhayan.
Ang naganap na kilos-protesta kahapon ay pangalawang aktibidad kontra sa proyekto sa loob ng isang buwan.
Noong 17 Oktubre, may 50 mangingisda mula sa kalapit na Sito Bagacay ang nangisda sakay ng kanilang mga bangka upang pasinungalingan ang sinasabi ni Consolacion Mayor Johannes Alegado at ng kanyang inang si Vice Mayor Teresita Alegado, na walang isda sa lugar dahil sa mga shipyard.
