HATAW! D'yaryo ng Bayan hatawtabloid.com
PATAY ang isang buntis na babae habang sugatan ang tatlong iba pa kabilang ang kanyang live-in partner matapos madisgrasya ang sinasakyan nilang motorsiklo sa Brgy. Guinhalaran, lungsod ng Silay, lalawigan ng Negros Occidental, nitong Biyernes, 6 Agosto.
Kinilala ng pulisya ang nasawi na si Aizel Legaspi, 21 anyos, residente sa naturang barangay, samantala sugatan ang kanyang kinakasamang si Mark Olvido, 23 anyos, John Carl Saldo, 21 anyos, at kasama niyang si Trujuillo, 20 anyos, kapwa mga residente sa Brgy. 5, sa nabanggit na lungsod.
Ayon kay P/Cpl. Julen Jay Apitong, traffic investigator ng Silay City Police Station, pauwi na ng kanilang bahay ang mag-asawa sakay ng kanilang motorsiklo nang bigla itong nailiko pakaliwa na saktong bumangga sa isang motorsiklong mabilis ang takbo, na sa lakas ng impact ay tumilapon silang apat.
Ani Apitong, binawian ng buhay si Legaspi habang ginagamot sa ospital dahil sa pinsala sa kanyang ulo, habang nananatili sa pagamutan ang tatlong sugatan.
Lumalabas sa imbestigasyon, walang suot na helment ang mag-asawa.
