PH local transmission ng Delta CoVid-19 variant, kinompirma ng DOH

KINOMPIRMA ng Department of Health (DOH) ang local transmission ng mga kaso ng kinatatakutang Delta CoVid-19 variant sa Filipinas.

Ayon sa DOH, ito’y matapos ang isinagawang “phylogenetic analysis” ng Philippine Genome Center at imbestigasyon ng Epidemiology Bureau.

“Clusters of Delta variant cases were seen to be linked to other local cases, therefore, exhibiting local transmission,” sabi ng DOH sa isang kalatas kagabi.

Sa pinahuling ulat, umabot sa 47 ang naitalang Delta CoVid-19 variant sa bansa at lahat ng tinamaan ay hindi pa nabakunahan.

Nauna rito’y sinabi ng OCTA research group, ang paglobo ng kaso ng CoVid-19 sa bansa ay maaaring dulot ng Delta variant.

Kaugnay nito, nangamba ang Philippine Hospital Association (PHA) sa posibleng epekto ng Delta variant sa mga pagamutan lalo na’t kulang sila ng manpower at ang mabagal na pagbabayad ng PhilHealth sa kanilang CoVid-19 claims.

Ang PHA ay binubuo ng mga pampubliko at pribadong pagamutan.

“Sa PhilHealth po, we have been telling them about the problem pero apparently mabagal lang po pagbabayad, nasa 15 percent pa lang ‘yung payment ng claims since March 2020 kaya wala rin kami pambili ng PPE,” sabi ni Dr. Jaime Almora, pangulo ng PHA, sa pagdinig sa Senado kaugnay sa Pandemic Protection Act.

Magugunitang inutusan ni Pangulong Rodrigo Duterte ang PhilHealth na madaliin ang pagbabayad sa mga ospital.

Nagbabala rin siya na magpapatupad muli ng lockdown kapag kumalat ang Delta variant sa bansa.