Responde ng Baguio team kailangan sa Cebu para tumulong sa contact tracing

NAKATAKDANG lumi­pad patungong Cebu sa Miyerkoles, 8 Hulyo, ang contact tracing team ng lungsod ng Baguio sa pangunguna ni Mayor Benjamin Magalong upang sanayin ang mga key police personnel para mapabuti ang kanilang sistema ng contact tracing nang sa gayon ay mapigilan ang pagkalat ng coronavirus.

Ani Magalong, mana­natili ang kanilang grupo sa lungsod ng Cebu sa loob ng tatlong araw upang sanayin ang mga pulis na nakata­laga sa contact tracing na pinamumunuan ni Police Regional Office-7 Director P/BGen. Albert Ignatius Ferro.

Gamit ng lungsod ng Baguio ang bagong teknolo­hiya sa contact tracing na nakatulong sa pagpapa­natili ng mababang bilang ng kaso ng COVID-19 sa lugar.

Sinabi ni Magalong na gusto niyang ibahagi ang kanilang teknolohiya sa iba pang local government units (LGUs) kaya agad siyang pumayag sa hiling ni Ferro.

Nauna nang nagbigay ng parehas na pagsasanay ang grupo ng alkalde sa mga kalapit na lalawigan ng Baguio na nakaranas ng pagtaas ng bilang ng mga kaso ng COVID-19.

Sa conceptual frame­work ng kanilang sistema, kabilang dito ang pagtukoy sa maaaring pinagmulan ng impeksiyon, isolation ng mga natukoy na tao, testing, at pagte-trace ng mga malalapit at malala­yong contacts para i-quarantine, testing, disinfection at medical protocols.

Gumagamit sila ng cognitive interviewing skill, isang paraan ng pagtata­nong na ginagamit ng pulisya upang matukoy ang mga nakasalamuha ng pasyente.

Ito ang magiging bata­yang datos ng pamahalaang panglungsod sa pag­papa­sya kung aling mga lugar ang isasailalim sa lock­down.

Inilinaw ni Magalong, ang susi sa matugampay na contact tracing ay nasa kalidad ng impormasyong makukuha ng mga tracer upang makita ang malinaw na paglalarawan ng impeksiyon sa lungsod.

Kasama sa kanilang ginagamit na sistema ang pagkombinsi sa pasyenteng ibigay ang kanilang pag­kakakilanlan upang mapadali ang contact tracing dahil maaalerto nito ang mga taong kanilang nakasalamuha at maba­bawasan ang haba ng oras ng kanilang paghahanap.

Gumagamit din sila ng computer-aided system, na ayon kay Magalong ay isang mabisang instrumento sa pagtukoy ng mga naka­salamuha ng mga pasyente.