Sa Marikina… 6,000 trike driver isinalang sa mass testing bago mamasada

KAILANGANG sumailalim sa mandatory mass testing ang 6,000 driver ng tricycle bago payagang pumasada sa lungsod ng Marikina.

 

Ito ang tiniyak ni Marikina City Mayor Marcy Teodoro na kalangan dumaan sa mandatory COVID-19 test ang 6,000 tricycle drivers ng lungsod na balik-kalsada dahil sa modified enhanced community quarantine (MECQ).

 

AnIya, isinasailalim nila sa rapid test ang naturang mga driver bilang precautionary measure laban sa pandemya.

 

Base sa huling datos ng Marikina LGU, may tatlong driver mula sa 1,000 sinuri nitong Lunes, 18 Mayo ang nagpositibo sa rapid test.

 

Pinag-quarantine umano sila at inihahanda para sa confirmatory testing gamit ang RT-PCR kits na “gold standard” ng World Health Organization.

 

Tatagal hanggang Biyernes, 22 Mayo, ang testing ng lungsod sa mga tricycle driver, pero ngayon pa lang ay pinaghahandaan na ng Marikina ang treatment sa mga magpo-positibo at contact tracing.

 

Ayon kay Teodoro, isasailalim din sa test ang mga nagtatrabaho sa palengke at groceries, maging ang mga empleyado sa shoe industry ng lungsod.

 

Sa datos ng lungsod, 149 ang confirmed cases ng Marikina hanggang noong Lunes, May 18.