Lihim na modus ng junkshop driver nabuking (Top 10 most wanted timbog sa droga)

ARESTADO ang isang truck driver ng junkshop na lumi­linya sa palihim na pag­tutulak ng droga kama­kalawa ng gabi, 19 Pebrero, sa bayan ng Lubao, lalawigan ng Pampanga.

Sa ipinadalang ulat ni P/Lt. Col. Michael John Riego, hepe ng Lubao Municipal Police Station kay PRO3 director P/BGen. Rhodel Sermonia, naaktohan ng kaniyang mga tauhan na nagbebenta ng hinihinalang shabu ang suspek na kinilalang si Rosalino Martinez, 54 anyos, driver ng truck na naghahatid ng mga kalakal sa iba’t ibang junkshop, at residente sa Bgy. Lourdes, ng nasabing lugar.

Kabilang sa top 10 most wanted sa listahan ng drug personalities sa provincial level ang suspek na sina­bing patuloy sa pagpa­palawak ng baluwarte.

Ayon kay Riego, sumu­ko ang suspek ngunit hindi umano huminto sa ilegal na gawain.

Batay sa imbestigasyon ng Station Drug Enforcement Unit (SDEU), nagsagawa sila ng test buy matapos inguso ng kanilang con­fidential asset ang modus na diskarte ni Martinez.

Habang nagdedeliber sa Olongapo ng mga kalakal ay pipihit ang suspek sa pinagkukuhaang source ng ilegal na droga upang umis­kor at palihim na ipina­mumudmod sa naghihintay niyang mga kliyenteng adik kapalit ng perang ibinabayad sa inorder na shabu.

Makaraang makompir­ma ang modus agad ikinasa ang entrapment operation laban sa suspek at nagkita sa naturang barangay ang magkabilang panig dakong 10:30 pm na ikinahuli ng suspek.

Nakuha mula sa suspek ang tatlong sachet ng shabu at P500 marked money ng mga anti-narcotics operative sa inilunsad na buy bust operation.

(RAUL SUSCANO)