ABS-CBN franchise ma-expired man… Operasyon ng Lopez TV network tuloy pa rin

PINAWI ni Senador Christopher “Bong” Go ang pangamba ng mga empleyado ng ABS-CBN matapos sabihin na maa­ari pa rin mag-operate ang naturang television network kahit paso na ang prankisa nito.

Ayon kay Go sa 5 May 2020, mapapaso ang prankisa ng ABS-CBN, 45 araw matapos ang expiration date sa 30 March 2020.

Ipinaliwanag ni Go, sakaling hindi mai-renew ang prankisa ng TV network dahil hindi inaksiyonan ng Mababang Kapulungan ng Kongreso, maaari naman humingi ng temporary permit to operate ang naturang kompanya sa National Telecommunicatiom Corporations ( NTC).

Nauna nang sinabi kahapon ni Senate President Vicente “Tito” Sotto III bilang dating Chairman ng Public Services Committee noong 10th Congress, maaaring mag-operate ang ABS-CBN hanggang matapos ang 18th Congress sa 2022 kung hindi ito aaksiyonan ng Mababang Kapulungan ng Kongreso.

Kaugnay nito, nanin­digan si Go na walang kinalaman si Pangulong Rodrigo Duterte sa pag­ha­hain ng quo warranto petition ni Solicitor General Jose Calida para ipawalang bisa ang prankisa ng ABS-CBN.

(CYNTHIA MARTIN)