Duterte hindi malubha — Sen. Bong Go

MAGPAHINGA nang ilang araw si Pangulong Rodrigo Duterte, ang payo ng kanyang doktor dahil sa pagsakit ng gulugod dulot ng muscle spasm nang sumempalng sa motorsiklo noong naraang linggo.

Ayon kay Sen. Chris­topher “Bong” Go, sumai­lalim sa magnetic reso­nance imaging (MRI) si Pangulong  Duterte kahapon ng madaling araw pagdating sa bansa mula sa Japan.

Batay aniya sa resulta ng MRI, walang naipit na ugat sa spinal column ng Pangulo at sabi ng doktor, muscle spasm ang sanhi nang nararamdamang sakit sa gulugod  ng Punong Ehekutibo.

“Ako na po ang mag-a-assure sa inyo, nothing to worry, purely muscle spasms po ‘yun at kaila­ngan lang po ng pahinga ng ating Pangulo,” aniya.

Kailangan aniyang uminom ng pain reliever ang Pangulo upang maib­san ang sakit ng gulugod, ayon sa payo ng doktor.

“Ang ikinabahala namin at first kung tina­maan ang kanyang spine since it was unbearable pain nga po ang nararam­daman niya kahapon pero salamat po sa Panginoon at wala naman pong da­pat ikabahala at tining­nan talaga ng doctor ha­bang ginagawa ‘yung MRI, tiningnan ng doctors kung mayroon bang naipit na ugat that caused the pain, wala naman po. Nakita nila purely muscle spasms at ‘yung gamot na ibinigay sa kanya para roun sa muscle spasms,” sabi ni Go.

Tiniyak ni Go, haharapin ni Pangulong Duterte sa Malacañang ngayon si Chinese Vice Premier Hu Chuanhua kahit may iniinda siyang sakit.

“Darating ang vice premier ng China tomor­row, haharapin niya. Kaya naman, alam mo si Pa­ngu­lo, kahit na may nararamdamang sakit talagang magtatrabaho, tatayo ‘yan, mataas ang threshold n’ya sa sakit,” dagdag ni Go.

Matatandaan, pinaik­li ng Pangulo ang kanyang official visit sa Japan dahil sa sinabing “unbear­able pain” sa gulugod.

ni ROSE NOVENARIO