Responsable sa Dengvaxia scandal mananagot (Tiniyak ng Palasyo)

TINIYAK ng Palasyo na ka­ka­suhan ang mga res­ponsableng personalidad  sa palpak na  anti-dengue vaccine program bago matapos ang kasalukuyang buwan.

“Appropriate charges will be lodged and pursued against government officials and private individuals found responsible by the DOJ for this failed health program for children,” ayon kay Presidential Spokesman Salvador Panelo.

Tinututukan aniya ni Pangulong Rodrigo Duterte ang lahat ng panawagan para sa hustisya ng mga pamilya ng mga batang namatay makaraan uma­nong  baku­nahan ng anti-dengue vaccine na Dengvaxia.

“He (Duterte) hears all the calls for justice of families of children whose deaths are reportedly caused by the said vaccine,” ani Panelo.

Inihayag kamakalawa ng Public Attorney’s Office (PAO) na ikinokonsidera ang pagsasampa ng kasong murder laban kina dating Pangulong Benigno Aquino III, dating Budget Secretary Florencio Abad at dating Health Secretary Janette Garin dahil sa pagkamatay ng mga batang naturukan ng Dengvaxia.

Matatandaan, sinus­pende ang implementasyon ng anti-dengue vaccine makaraan ihayag ng French pharmaceutical company Sanofi Pasteur, manu­facturer ng Dengvaxia, noong Nobyembre 2017, na mapanganib na iturok  ang naturang anti-dengue vac­cine sa mga taong walang history ng dengue.

(ROSE NOVENARIO)