20-anyos epileptic ginahasa ng utol at ama

NAGA CITY – Ginahasa ng kanyang ama at 14-anyos kapatid ang 20-anyos babaeng may sakit na epilepsy sa bayan ng San Pascual, Masbate.

Ayon kay Chief Insp. Edgar Butch Moraleda, hepe ng San Pascual PNP, natutulog ang biktima nang mangyari ang panggagahasa ng kanyang lasing na 42-anyos ama.

Agad nagsumbong ang biktima sa kanyang tiyahin makaraan ang insidente.

Sa imbestigasyon ng mga awtoridad, napag-alaman din na ginahasa rin ang biktima ng 14-anyos binatilyo niyang kapatid.

Ayon kay Moraleda, umamin ang mag-ama na hiwalay nilang ginahasa ang biktima.

Nakompiskahan ng ilegal na droga ang ama sa isinagawang body search ng mga awtoridad.

Sinabi ni Moraleda, sasampahan nila ng kasong rape ang dalawang suspek ngunit itu-turn-over nila sa kostudiya ng Department of Social Welfare and Development (DSWD) ang menor de edad.

Mahaharap din ng kasong paglabag sa Comprehensive Dangerous Drugs Act of 2002 ang ama ng biktima.