NPA Honcho may P2-M patong sa ulo arestado

BUTUAN CITY – Mahigpit ang seguridad ng pulisya sa naarestong top leader ng New People’s Army (NPA) sa bayan ng Claver, Surigao del Norte kamakalawa.

Naaresto mula sa kanyang inuupahang bahay si Jonathan Cadaan Peñaflor alyas Jojo Peñaflor o alyas Lurkan at Albert, sa Purok 7, Brgy. Ladgaran sa nasabing bayan dakong 2 p.m. kamakalawa.

Si Peñaflor ay may patong sa ulo na P2 milyon.

Sinasabing si Peñaflor ang commanding officer nang tinaguriang Sangay sa Partido Platoon 21C, Guerilla Front Committee 21, NEMRC ng Communist Party of the Philippines-New People’s Army (CPP-NPA).

Naaresto ang suspek ng mga tauhan ng Regional Intelligence Division (RID) 13 Tracker Team at Regional Public Safety Battalion (RPSB-13) base sa arrest warrant na ipinalabas ni acting Presiding Judge Emmanuel Escatron ng Regional Trial Court Branch 30, 10th Judicial Region na nakabase sa Surigao City noong Disyembre 27, 2013 sa kasong murder.

Narekober ng arresting team sa bahay ng rebelde ang isang combat commander colt at Para-Ordnance .45 caliber pistols kasama ang bala ng mga ito.

Napag-alaman, isang taon isinailalim sa surveillance ang suspek at nito lamang nakalipas na linggo nakatanggap ng impormasyon ang pulisya na siya ay nasa Claver.