4 sugatan sa taxi vs kuliglig, SUV nadamay

APAT ang sugatan makaraan magbanggaan ang isang taxi at kuliglig sa Roxas Boulevard sa Maynila, nitong Martes ng madaling-araw.

Habang nadamay ang isang sports utility vehicle (SUV) na umiwas lang sa nakahambalang na mga sasakyan.

Depensa ng driver ng taxi na si Manuel Guerrero, marahan ang kanyang pagmamaneho nang magulat siya sa isang nakaparadang kuliglig.

Sinubukan ng driver na umiwas ngunit hindi na rin niya nakontrol ang sasakyan.

Nawasak ang harapan ng taxi habang nayupi ang kuliglig.

Samantala, ang SUV na kasalubong ng taxi ay napasampa sa gutter bago humampas sa isang poste.

Nasaktan sa insidente ang dalawang pasahero at driver ng taxi, gayondin ang driver ng SUV.

Depensa ng nagmamaneho ng kuliglig na si Amando Mariano, nagkaaberya ang kanyang sasakyan na dapat magde-deliver ng mga gulay.

Aminado siyang may nilabag na batas-trapiko dahil bawal ang pagdaan ng mga kuliglig sa Roxas Boulevard.