Inaugural speech ni Digong simple, 5 minuto lang

Davao CITY – Nangako si President-elect Rodrigo Duterte na aabot lamang sa limang minuto ang kanyang speech sa inauguration ceremony sa Hunyo 30.

Ayon sa incoming president, hindi na kailangan ng mahahabang speeches dahil may cabinet secretaries siya na magbibigay ng pahayag sa polisiya ng administrasyon.

Samantala, muling iginiit ni Duterte na mananatiling simple pa ang kanyang oath-taking na isasagawa sa Malacañang para wala na aniyang masasayang na pera para sa isang event.

Napag-alaman, maliit lang ang Malacañang at aabot lamang sa 500 ang kaya nitong i-accommodate.

Ngunit para kay Duterte, hindi raw ‘yon importante dahil kahit 150 katao lamang ay matutuloy pa rin ang nasabing event.

Kabilang sa inaasahang dadalo sa inagurasyon ay mga miyembro ng diplomatic corps, mga opisyal ng iba’t ibang sangay ng gobyerno at kanyang pamilya.

Kahit sa pagkain, nais ng opisyal na maghanda nang simple.

Sa kabilang dako, aasahan na mananatili pa rin si Duterte sa lungsod ng Davao hanggang Hunyo 30 at kukuha siya ng commercial flight papuntang Metro Manila.